БУЗУРГДОШТИ БУЗУРГЗОДА

                 Душанбе, 19 декабр. (АМИТ «Ховар», Бекназари Абӯбакр). — 18 декабр дар Китобхонаи миллии Тоҷикистон ба номи Абулқосим Фирдавсӣ бахшида бо 100-солагии забоншинос ва адабиётшиноси маъруфи тоҷик Лутфулло Бузургзода ҳамоише баргузор гардид, ки дар он ин донишманд аз поягузорони илми забоншиносии тоҷикӣ унвон шуд.                     Ба гуфтаи устоди Донишгоҳи миллии Тоҷикистон Миршакар Бобомуродов нахустин китоби граматика ё сарфу наҳви забони тоҷикӣ аз ҷониби Лутфулло Бузургзода таҳия шуда, китобҳои ӯ бо номҳои «Фонетикаи забони адабии тоҷик», «Морфологияи забони тоҷикӣ» ва «Синтаксиси забони адабии тоҷик» солҳои 1940 — 1942 дар нашриёти шаҳри Ленинград чоп шудаанд.                     Гуфтанист, ки Лутфулло Бузургзода дар 34 соли зиндагӣ аз худ беш аз 20 асари гаронбаҳои илмию адабӣ ба мерос гузоштааст. Л. Бузургзодаро як донишманди бисёрҷанба буда, на танҳо дар илми забоншиносӣ, балки дар шевашиносӣ, фолклоршиносӣ, мусиқишиносӣ ва адабиёт низ муваффақ буд ва дар ин бахшҳо низ осоре аз худ ба ёдгор гузоштааст.                     Лутфулло Бузургзода аз ҷумлаи шахсиятҳое буд, ки дар Ҷанги Дуюми Ҷаҳонӣ ширкат карда, 12 ноябри соли 1943 дар ҷараёни даргириҳо дар вилояти Витебски Белорус ҳалок мегардад. Ҷасади ӯ дар қабристони умумӣ, дар канори 23 сарбози дигари шӯравӣ, дар рустои Слободкои Белорус дафн шудааст.