КОНФРОНСИ БАЙНАЛХАЛҚӢ ДАР ДУШАНБЕ БАРГУЗОР МЕГАРДАД

                 Ню — Йорк, 24 декабр. (АМИТ «Ховар» — СММ). — Иҷлосияи 64 – уми Маҷмаи кулли СММ қатъномаи бахшида ба ҷараёни амалӣ сохтани барномаи амалиёти байналхалқии даҳсолаи «Об барои ҳаёт» — ро маъқул донист, ки бо ташаббуси Президенти Тоҷикистон мавриди амал қарор гирифта буд.                 Дар қатънома ба мамлакатҳои аъзои СММ тавсия дода мешавад, ки тадбирҳои ба даст овардани ҳадафҳояшонро дар соҳаи истифодаи оқилонаи захираҳои об давом диҳанд. Дар қатънома гуфта мешавад, ки захираҳои об барои зиндагии шоистаи инсон, рушди устувор, аз ҷумла ҳифзи муҳити зист, барҳам додани қашшоқию гуруснагӣ аҳамияти ҳалкунанда дорад.                Дар қатънома пешниҳоди Ҳукумати Тоҷикистон дар бораи гузаронидани конфронси байналхалқӣ моҳи июни соли 2010 бо иштироки роҳбарону намояндагони баландпояи мамлакатҳои ҷаҳон дар шаҳри Душанбе дастгирӣ карда мешавад. Дар конфронси мазкур ҷараёни иҷрои барномаи байналхалқии амалиёти «Об барои ҳаёт» таҳлил карда хоҳад шуд. Ҳаммуаллифони қатъномаи мазкур 35 мамлакати ҷаҳон мебошанд.