НАМОЯНДАИ ДУШАНБЕ ДАР ЖЕНЕВА ГУЗОРИШ МЕДИҲАД

                    Душанбе, 9 декабр.(АМИТ «Ховар», Марзия Саидова).-Муовини Раиси шаҳри Душанбе Маъруф Сайфиев аз миёни кишварҳои Осиёи Марказӣ ягона намоянда аст, ки дар мизи мудаввари «Проблемаҳои гуманитарӣ дар чаҳорчӯбаи урбанизатсия» ва «Муколамаи Комиссари Олӣ оид ба масъалаҳои баҳсноки ҳимояи ҳуқуқ» ширкат ва суханронӣ менамояд.                     Форуми мазкур бо иқдоми Комиссари Олии Созмони Милали Муттаҳид дар умури паноҳандагон созмон дода шудааст, ки имрӯзҳо дар шаҳри Женеваи Швейтсария идома дорад.                      Бояд гуфт, ки баргузории ин нишаст дар ҳалли проблемаҳои гурезагон, ки мутаассифона дар низоми ҳамзистиҳои ҷаҳонӣ бар асари даргириҳои гуногун бе сарпаноҳ монда, дар ғурбат умр ба сар мебаранд, нақши муассир хоҳад гузошт.                      Аз хадамоти матбуоти Раиси шаҳри Душанбе ба АМИТ «Ховар» иттилоъ доданд, ки дар нишасти мазкур таҷрибаи Душанбе дар ҳалли масъалаҳои паноҳандагон аз ҷониби кишварҳои дигари аъзои СММ мавриди пажӯҳиш қарор дода мешавад.