ПОКИСТОН УЗВИ СҲШ ШУДАН МЕХОҲАД

                  Исломобод, 10 декабр. (АМИТ «Ховар» — нюсланд.ру). – Моҳи июни соли 2010 дар Тошканд лоиҳаи низомномаи тартиби қабули мамлакатҳои нав ба узвияти Созмони ҳамкории Шанхай қабул карда мешавад.                    Созмон ба қабули мамлакатҳои нав ба узвияти худ тайёр аст, ки ҳадафҳо ва принсипҳои ҳуҷҷати хотимавии онро иҷро менамоянд.                    Президенти Покистон Осаф Алии Зардорӣ 9 декабр дар Исломобод зимни мулоқоташ бо муншии умумии Созмони ҳамкории Шанхай Болат Нургалиев хоҳиш намуд, ки Покистон ба узвияти созмон қабул карда шавад. Бояд гуфт, ки Покистон дар СҲШ ҳуқуқи мушоҳидро дорад.                   Президенти Покистон зикр намуд, ки мамлакаташ дар шароити торафт бештар паҳн гардидани хавфи терроризм ва ифротгароӣ ба узвияти СҲШ ниёзманд мебошад. Зеро яке аз ҳадафҳои асосии созмон муборизаи якҷоя ба муқобили терроризм ба шумор меравад.                    Мухбири АМИТ «Ховар» хабар медиҳад, ки моҳи январи соли 2010 муншии нави умумии СҲШ вазири собиқи корҳои хориҷии Ҷумҳурии Қирғизистон Муродбек Имоналиев ба иҷрои вазифаҳояш шурӯъ менамояд.