ТАЪСИСИ МАРКАЗИ ИННОВАТСИОНИИ МАМЛАКАТҲОИ ИДМ

                   Маскав, 15 декабр. (АМИТ «Ховар» — рг.ру). — 17 декабр дар шаҳри Дубна маҷлиси роҳбарон ва намояндагони муассисаҳои илмии мамлакатҳои ИДМ баргузор мегардад. Дар он масъалаи таъсиси Маркази байналхалқии инноватсионӣ ва нанотехнологияи мамлакатҳои ИДМ муҳокима карда мешавад. Тибқи қарори қабулшуда маркази мазкур дар заминаи Пажӯҳишгоҳи муттаҳидаи таҳқиқоти ядроии ба номи Курчатов бо истифодаи минтақаи махсуси иқтисодӣ дар Дубна ташкил карда хоҳад шуд.                      Дар маҷлис олимону мутахассисони машҳури мамлакатҳои ИДМ, аз ҷумла, раиси Академияи миллии илмҳои Украина Борис Патон, вазири иқтисодиёти Арманистон Нерсес Еритсян, Раиси Академияи илмҳои Арманистон Радик Мартиросян, директори Пажӯҳишгоҳи физикаи ядроии Қазоқистон Одил Тулеушев, раиси Академияи илмҳои Тоҷикистон Мамадшо Илолов, саркотиби илмии Академияи илмҳои Қирғизистон Исобек Ҳошимов, директори генералии агентии инноватсионӣ ва нанотехнологияи Академияи илмҳои Молдавия Геннадий Черней, намояндагони Донишгоҳи давлатии Боку ва дигарон иштирок менамоянд.                     Ҳадафи ташкили марказ ба вуҷуд овардани воситаҳои нави ҳамкории илмию инноватсионӣ, ба бозори ҷаҳон баровардани дастовардҳои илмӣ, рушди босуръати соҳаҳои инноватсионӣ ва нанотехнологӣ дар мамлакатҳои ИДМ ва ба бозори байналхалқӣ баровардани дастовардҳои илмӣ дар ин соҳаҳо мебошад.                    Ба маркази мазкур аз тамоми мамлакатҳои Иттиҳод кадрҳои варзида ҷалб карда мешаванд.                    Айни ҳол даҳ мамлакати ИДМ изҳор намуданд, ки дар ташкили марказ саҳм мегузоранд.