МУҲОКИМАИ БАРНОМАИ КАМ КАРДАНИ ИСТЕЪМОЛИ МАШРУБОТ

                 Женева, 19 январ. (АМИТ «Ховар» — СММ). — Иштирокчиёни иҷлосияи 126 – уми Кумитаи иҷроияи Созмони ҷаҳонии тандурустӣ лоиҳаи барномаи ҷаҳонии стратегии кам кардани истеъмоли аз ҳад зиёди машруботро дар саросари ҷаҳон муҳокима менамоянд. Иҷлосияи мазкур 18 январ дар Женева кушода шуд. Дар лоиҳаи барнома гуфта мешавад, ки дар давоми як сол аз бемориҳои вобаста ба истеъмоли аз ҳад зиёди машрубот қариб 2,5 миллион нафар, аз ҷумла 320 ҳазор ҷавонони аз 15 то 29 – сола вафот мекунанд.                   Ба қавли муаллифони барнома, аз ҳад зиёд истеъмол кардани машрубот ба саломатии одамон таъсири ҷиддии манфӣ расонда, яке аз сабабҳои вафоти пеш аз мӯҳлат ва маъюбии онҳо мебошад. Илова бар ин машрубот ва хусусан нӯшокиҳои спиртдор ба пайдоиши бемориҳои асаб, сирояткунанда, саратони ҷигар ва навъҳои дигари он мусоидат мекунад.                   Хеле зиёд гардидани ҳодисаҳои фалокат дар роҳу нақлиёт, вайрон шудани оилаҳо ва проблемаҳои дигари иҷтимоӣ асосан ба истеъмоли аз ҳад зиёди машрубот вобастагӣ дорад.                    Созмони ҷаҳонии тандурустӣ мамлакатҳои ҷаҳонро даъват менамояд, ки барномаи мазкурро омӯхта, барои кам кардани истеъмоли машрубот тадбирҳои судбахш андешанд.                     Тибқи нақша барномаи мазкур дар ҷараёни иҷлосияи 126 – уми созмон қабул карда хоҳад шуд.