Н. САЛИМОВ: ДАР СОЛИ 2009 — 7219 НАФАР БЕМОРИИ СИЛ

                   Душанбе, 13 январ. (АМИТ «Ховар», Ибодат Давлатова ). – Дар соли 2009 дар ҷумҳурӣ 152 ҳодисаи бемории вараҷа ба қайд гирифта шудааст, ки нисбати ҳамин давраи соли 2008 49,5 фоиз камтар аст, гуфт зимни нишасти матбуотӣ Вазири тандурустии Ҷумҳурии Тоҷикистон Нусратулло Салимов.                     Ҳамчунин, иброз намуд, ки аз ин 112 ҳодиса ба вилояти Хатлон, 35 ҳодиса ба ноҳияи тобеи ҷумҳурӣ, 3 ҳодиса ба вилояти Суғд, як ҳодиса ба ВМКБ ва 1 ҳодиса ба шаҳри Душанбе рост меояд. Аз ин ҳисоб як ҳодисаро вараҷаи тропикӣ ташкил медиҳад.                      Инчунин, ӯ қайд намуд, ки Барномаи мубориза бар зидди бемории сил барои солҳои 2003-2010 дар ҷумҳурӣ амалӣ гардида истода, лоиҳаи нави «Барномаи миллии ҳимояи аҳолӣ аз бемории сил барои солҳои 2010-2015» таҳия ва қабул гардид.                         Ташхису табобати беморони гирифтори шакли мутобиқгаштаи сил ба роҳ монда шуда, айни ҳол 48 нафар беморон зери табобат қарор доранд. Қарордод дар хусуси маблағгузорӣ ва аз моҳи маи соли 2010 ба табобат фаро гирифтани 400 бемори гирифтори шакли мутобиқгаштаи сил ба даст омадааст.                          Бояд қайд намуд, ки дар соли 2009 — 7219 нафар бемории сили фаъол ба қайд гирифта шуд, ки 6005 нафарашон бори аввал ошкор шудаанд. Дар маҷмӯъ нисбати соли гузашта 441 нафар бемор кам ба қайд гирифта шуда, беморони бори аввал дарёфтшуда бошад, 110 нафар кам гаштааст.