Р. НАЗАРОВ: СОЗИШНОМА БАЙНИ ҶТ ВА ФР БА ИМЗО РАСИД

               Душанбе, 28 январ. (АМИТ «Ховар», Жасмин Назарова). – Дирӯз 27 январ дар Агентии назорати маводи нашъаовари назди Президенти Ҷумҳурии Тоҷикистон (АНМН) нишасти матбуотӣ баргузор гардид.                Дар нишаст директории Агентии назорати маводи нашъаовари назди Президенти ҶТ генерал – лейтенант Рустам Назаров иштирок намуд. Р. Назаров аз фаъолияти солонаи агентӣ ҳисобот дода, изҳор намуд, ки дар соли 2009 аз ҷониби мақомоти ҳифзи ҳуқуқ ва сохторҳои қудратии ҶТ 796 ҳодисаи вобаста ба муомилоти ғайриқонунии маводи нашъаовар ошкор ва қатъ гардид, ки нисбат ба соли 2008 – 15,9% зиёд мебошад. Аз муомилоти ғайриқонунии маводи нашъаовар 4 571 кг 604 гр мусодира гардиданд. Аз он 1 132 кг 686 гр героин, 1066 кг 154 гр афюн ва 2 372 кг 764 гр маводи нашъадори гурӯҳи каннабис ташкил медиҳад.                Инчунин АНМН дар соли сипаришуда 152 ҳодисаи вобаста ба муомилоти ғайриқонунии маводи нашъаоварро ошкор ва қатъ намуданд. Шӯъбаи тафтишоти Агентӣ бошад, 135 парвандаи ҷиноятӣ оғоз намуд. Аз он 107 парванда нисбати 143 нафар ба суд ирсол карда шуд, — гуфт Р. Назаров.                 Ҳамзамон дар ҷараёни амалиёти «Кӯкнор — 2009» аз муомилоти ғайриқонунӣ 2 385 кг 322 гр воситаҳои нашъаовар мусодира гардид. Аз ҷумла, 787 кг 227 гр героин, 532 кг 596 гр афюн ва 1 165 кг 469 гр каннабис, инчунин 93 ҳодисаи бангдонаи худрӯй ва 2 307 208 буттаи он дар майдони умумии 18,4 гектар нобуд карда шуд.                  Ҳамчунин, соли 2009 Созишнома байни Ҳукумати Ҷумҳурии Тоҷикистон ва Ҳукумати Федератсияи Россия дар бораи ҳамкорӣ дар мубориза бар зидди муомилоти ғайриқонунии воситаҳои нашъадор, моддаҳои психотропӣ ва сӯйистеъмоли онҳо ба имзо расид, қайд намуд Рустам Назаров.                  Дар охир роҳбарияти Агентӣ ба саволҳои хабарнигорон ҷавобҳои мушаххас доданд.