ШӮРОИ ВОСИТАҲОИ АХБОРИ ОММАВИИ ТОҶИКИСТОН БА ФАЪОЛИЯТ ШУРӮЪ МЕНАМОЯД

                   Душанбе, 20 январ. (АМИТ «Ховар», Таҳмина Ғоибназарова). – 22 январ дар Иттифоқи журналистони ҷумҳурӣ маросими шиносоӣ бо фаъолияти Шӯрои воситаҳои ахбори оммавии мамлакат баргузор хоҳад гашт. Тибқи нақша, дар он раиси Шӯрои воситаҳои ахбори оммавӣ Иброҳим Усмонов дар бораи фаъолият ва ҳадафу вазифаи шӯро ва нақшаю вазифаҳои он дар соли 2010 сухан меронад.                      Ба иштирокчиёни ҷамъомад «Роҳнамои танзими фаъолияти воситаҳои ахбори оммавӣ» тақсим карда хоҳад шуд, ки намояндагии САҲА дар Тоҷикистон нашр намудааст.                       Мухбири АМИТ «Ховар» ёдовар мешавад, ки Шӯрои воситаҳои ахбори оммавии Тоҷикистон 30 октябри соли 2009 таъсис ёфта буд. Фаъолияти он дар мақомоти дахлдор 14 январи соли 2010 ба расмият дароварда шуд.