ҶАШНИ ЗОДРӮЗИ ШОИРА

Душанбе, 17  феврал. (АМИТ «Ховар», Таҳмина  Ғоибназарова). —  Шоираи  маъруфи тоҷик  Ҳадиса  Қурбонова  имрӯз  70 – сола шуд.  Инчунин  ҳамин рӯз   асари нави  ӯ  бо  номи «Тӯфон»  аз  чоп  баромад, ки дар  бораи  воқеаҳои охири  солҳои  90 – уми  асри  гузашта  нақл  карда,  ба  Ҳунарпешаи  мардумии  Иттиҳоди  Шӯравӣ  Ҷӯрабек  Муродов  бахшида  шудааст. Пагоҳ  дар  бинои  Иттифоқи  нависандагони  ҷумҳурӣ  мулоқоти  эҷодии  шоира бо  мухлисони  эҷодиёташ  баргузор мегардад. Ҳамкорон,  ҳамкасбон,  хешу таборон  ва  ҳамсолонаш   ӯро  ба  муносибати   рӯзи  таваллуд  ва  нашри  асари  наваш  табрик  хоҳанд  кард. Ҳадиса  Қурбонова  зимни  сӯҳбат бо  мухбири  АМИТ «Ховар»  зикр  намуд, ки   айни  ҳол  ба  навиштани  ду  достон ва  шеърҳои  нав  машғул  аст.  Шоира ният  дорад, ки оянда  бахшида ба  шоирони  бузурги  классики форсу  тоҷик  Ҳофизи  Шерозӣ ва Абулқосим  Фирдавсӣ  достонҳо  эҷод  намояд. Ҳ.Қурбонова  аз  солҳои  таҳсил  дар  мактаб —  интернат  ва  Донишгоҳи давлатӣ  ба  навиштани  шеър  машғул  аст. Маҷмӯаҳои  ашъори «Ваъдаю  вафо», «Сипос», «Шафақҳои Октябр», очеркҳои «Аз  пайраҳа  то шоҳроҳ»  бахшида ба  Қаҳрамони  Меҳнати  Сотсиалистӣ  Розия  Қурбонова, «Заҳмати  пуршарафи боғдорон»,  намоишномаҳои «Мӯниса»,  «Чорсӯ»,  «Шамъи  ҷовид» ва  ғайра натиҷаи  меҳнати  эҷодии  ӯ  мебошанд. Ҳ.Қурбонова  узви  Иттифоқи  нависандагони  ИҶШС  мебошад. Ӯ  ҳамчунин  асарҳои  нависандагону  шоирони  миллатҳои  дигарро  ба  тоҷикӣ  тарҷума  кардааст. Тарҷумаи  ашъори  шоири белорус  Антон Белевич,  ашъори  шоири туркман Махдумқулӣ, адибаи  ӯзбек  Зулфия,  адибаи  арман  Силвия Капутикиян,  адибаи  авар Фазу  Алиева,  адиби  қирғиз  Суюнбой  Эралиев  ва  нависандаи  муғул  Намзаддин  Надмид  ба  қалами  ӯ  тааллуқ  доранд.