БАРРАСИИ ПРОБЛЕМАҲОИ ОБУ ЭНЕРГЕТИКАИ ОСИЁИ МАРКАЗӢ

           Душанбе,  24  феврал. (АМИТ «Ховар», Наргис  Бояхмедова). —   Ҳайати  Бонки рушди  Осиё  таҳти  роҳбарии   мудири   шӯъбаи  ҳамкории  минтақавии  бонк Шигеко Хатторӣ рӯзҳои  22 ва  23  феврал  дар  Тоҷикистон  мусофират  дошт.  Аъзои  ҳайат  бо  ҷараёни  иҷрои  барномаи   ҳамкории  минтақаи  Осиёи  Марказӣ  шинос  гардид.  Меҳмонон  инчунин  бо   кормандони  масъули  Ҳукумати  ҷумҳурӣ  мулоқот  карданд.            Хабар  дода  мешавад, ки   дар  доираи   ҳамкории  иқтисодии   мамлакатҳои  Осиёи  Марказӣ дар Тоҷикистон  ба  маблағи бештар  аз  180  миллион  доллари  ИМА  чор  барнома  мавриди  иҷро  қарор  дорад. Ин  барномаҳо  ба  тармиму таҷдиди   роҳи  мошингарди  Душанбе – сарҳади  Қирғизистон,  беҳтар  сохтани  фаъолияти  муассисаҳои гумрук,  сохтмони  хати баландшиддати  интиқоли  барқ  дар  байни  Тоҷикистону  Афғонистон  ва тармиму таҷдиди  шабакаи тақсимоти  қувваи барқ  дар  НБО «Норак»  марбут  мебошанд.            Роҳбари  ҳайат  Ш. Хатторӣ  дар  бораи  проблемаҳои обу  энергетикаи   Осиёи  Марказӣ  сухан  ронда,  зикр  кард, ки  ин  проблемаҳо  бояд  дар  сатҳи  минтақа  зимни  гуфтушунидҳои  дуҷониба  ҳал  карда  шаванд.            Барномаи   ҳамкории  иқтисодии  мамлакатҳои  Осиёи  Марказӣ  соли  1997  таъсис  ёфта  буд.  Ба  он   Афғонистон,  Озарбойҷон,  Чин,  Қазоқистон,  Қирғизистон, Муғулистон, Тоҷикистон  ва  Ӯзбекистон  шомиланд. Барнома   зимни  хамкорӣ бо  шаш  муассисаи  калонтарини  молиявӣ — Бонки  рушди  Осиё, Бонки  тармиму таҷдид  ва  рушди  Аврупо,  Хазинаи  байналмилалии  асъор, Бонки   исломии  рушд, Муассисаи  рушди  СММ  ва  Бонки  ҷаҳонӣ  амалӣ  карда  мешавад.             Тоҷикистон  соли  1998   узви   барномаи  мазкур  гардида буд.  Дар  доираи барнома  то  имрӯз  ба  Тоҷикистон  ба  маблағи  қариб  560  миллион  доллари  ИМА  кӯмакҳои техникӣ  расонида  ва  қарзҳои  имтиёзнок  дода шуданд.