НАМОИШГОҲИ БАЙНАЛХАЛҚИИ САНОАТӢ ДАР ДУШАНБЕ БАРГУЗОР МЕГАРДАД

Душанбе,  10  феврал. (АМИТ «Ховар», Покиза Маҳмадбекова). —  Ширкати «Экспоцентралазия» ҳамроҳи  Палатаи  савдо  ва  саноати  Тоҷикистон аз  16  то  18  марти  соли  2010  дар  шаҳри  Душанбе   намоишгоҳи  байналхалқии  саноатию  тиҷоратиро ташкил  менамояд. Дар  он  қариб  100 корхонаю ширкати   бештар  аз  20  мамлакат,  аз ҷумла,  Тоҷикистон,  Русия, Қазоқистон, Қирғизистон,  Эрон, Италия,  Олмон, Аморатҳои  Муттаҳидаи  Араб,  Чин,  Булғористон, Озарбойҷон  ва  Финляндия  иштирок  менамоянд. Намоишгоҳи  мазкур барои  бисёр  корхонаю  ширкатҳо  ва   содиркунандагони мол  аҳамияти  калон дорад. Зеро  соҳаи  тиҷорати  байналхалқии  Тоҷикистон  ҳанӯз  тараққӣ  накардааст,  бисёр  соҳаҳои  иқтисодиёт  имкониятҳои  калони  ҳамкорӣ  доранд ва  ниёзманди  сармоягузорӣ  мебошанд.  Ҳаминро  ҳам  зикр  кардан  лозим  аст, ки  дар  намоишгоҳи  мазкур  на танҳо  роҳбарону  мутахассисони  корхонаю  ширкатҳои  маҳаллӣ,  балки   корхонаю  ширкатҳои  мамлакатҳои  ҳамсоя,  аз  ҷумла  Афғонистон  ва  Ӯзбекистон  ширкат  хоҳанд  варзид. Ширкати  байналхалқии  «Экспоцентралазия» 7  сол  боз  дар  минтақаи  Осиёи  Марказӣ  ба ташкили   намоишгоҳҳо  машғул  аст.  Ширкати  мазкур  дар  ин  муддат   бештар  аз 15  намоишгоҳ  ташкил  намудааст.