НАМОИШГОҲИ ТОҶИКИСТОН ДАР БРЮССЕЛ

Душанбе,  12  феврал. (АМИТ «Ховар»,Наргис  Бояхмедова). —  Сафорати  Ҷумҳурии  Тоҷикистон  дар  Белгия  бори  аввал   дар  шаҳри Брюссел  таҳти  унвони «Тоҷикистон – боми  ҷаҳон»  намоишгоҳ  ташкил  намуд. Аз  дафтари  матбуоти  ВКХ Тоҷикистон  ба  АМИТ «Ховар»  хабар  доданд, ки  ҳадафи  кушодани  намоишгоҳ  муаррифии  Тоҷикистон  ба  халқҳои  ҷаҳон,  додани  маълумот  дар  бораи   сохтори  сиёсӣ,  таърих  ва  тамаддуну  фарҳанги  имрӯзаю  ояндаи  халқи тоҷик  мебошад. Дар  маросими  ифтитоҳи  намоишгоҳ  муаррифии Парчам  ва  Нишони  миллии  Ҷумҳурии  Тоҷикистон  баргузор  гардид. Дар намоишгоҳ   асарҳои  гуногуни  Президенти  мамлакат Эмомалӣ  Раҳмон  ва  олимони тоҷик  пешкаши тамошобинон  гардонида  мешавад. Як  қисми  намоишгоҳро   асарҳои  рассомони тоҷик  оро  медиҳанд. Тамошобинон  зимни  тамошои  намоишгоҳ бо роҳҳои туристии Тоҷикистон,  меҳмонхонаҳои  он,  муассисаҳои  хизматрасонӣ  ба  сайёҳон  ва  ғайра  шинос  мешаванд.