ШАҲРВАНДОНИ ХОРИҶӢ БАРОИ ҚОЧОҚИ НАШЪА ДАСТГИР ШУДАНД

Душанбе,  16  феврал. (АМИТ «Ховар», Фирдавс  Таваров). —  Аз  дафтари  матбуоти  Хадамоти  гумруки  назди  Ҳукумати  ҷумҳурӣ  ба  АМИТ «Ховар»  хабар  доданд, ки   дар  давоми  ҳафтаи  гузашта дар  фурудгоҳи  шаҳри  Душанбе  се  кӯшиши  қочоқи  маводи  нашъадор  пешгирӣ  карда  шуд. Аз  ҷумла,  кормандони шӯъбаи  гумруки  фурудгоҳи  шаҳри  Душанбе  11  феврал  дар  ҷараёни  аз  назар  гузаронидани  бору бағоҷи  мусофирони   ҳавопаймои  мусофирбари  Душанбе – Бишкек   шаҳрванди  24 – солаи  Латвия  Кристина  Бизюлевичют, шаҳрванди  45 – солаи  Литва  Дале Дексниене   ва шаҳрванди  29 – солаи Федератсияи  Русия  Игор Шестаковро   дастгир  намуданд. Зимни  тафтиш  аз   бағоҷи  дастии  Кристина  Бизюлевичют 6  халтача  бо  як  килограмму  795  грамм  героин,  аз  бағоҷи  дастии  Дале Дексниене 6  халтача  маводи  нашъадор  бо  вазни  1  килограмму  604  грамм  героин  ва  аз бағоҷи  дастии Игор Шестаков  4  халтача  маводи  нашъадор  (вазнаш 1 килограмму 606  грамм)  героин  ёфт  шуд. Вазни  умумии  героини  мусодирашуда 5  килограмму  5 грамм  мебошад. Инчунин 12  феврал  дар  дидбонгоҳи  гузаргоҳи  сарҳадии «Панҷи  поён»  шаҳрванди  Афғонистон  Фирӯз  Аҳмад валади  Тоҷмуҳаммад  дастгир  карда шуд, ки  мехост  71  килограмм шираи  камолро  аз  Тоҷикистон  ба  Афғонистон  барад. Қочоқчӣ  шираи  камолро  дар  махфигоҳи  махсуси   мошини  сабукрав  пинҳон  карда буд. Мухбири  АМИТ «Ховар» ёдовар мешавад, ки дар  Тоҷикистон  ғайриқонунӣ  ҷамъ  овардан  ва  ба  хориҷа  бурдани  шираи  камол  дар  асоси  қонун  манъ  карда  шудааст. Бояд  гуфт, ки  шираи  камол  дар  саноати  дорусозӣ   истифода бурда  мешавад ва нархи  1  килограмми он  дар  Афғонистон  50  доллари  ИМА  мебошад. Тӯли  рӯзҳои  гузашта  инчунин  кормандони  Агентии  назорати  маводи  нашъадори  Тоҷикистон  дар  қаламрави  мамлакат   якчанд  кӯшиши  фурӯхтани  маводи  нашъадорро  пешгирӣ  намуданд. Аз  ҷумла,  дар  ҷараёни  кофтукови  хонаи  истиқоматии  сокини   58 —  солаи  ноҳияи  Ҳисор  А.И. 9  килограмм  героин,  дар  ҳудуди  Шифохонаи  шаҳрии  №1  — ум  22,7  грамм  афюни  хом, аз  сокини  27 —  солаи  ноҳияи  Файзобод  З.Э. 142,3  грамм  каннабис  ва аз  мошини  сабукрави  сокини  пойтахт Н.Х. 126,8  грамм  моддаи  нашъадори  каннабис  ёфт  шуд.  Ному  фамилияи  пурраи  шахсони  дастгиршуда барои  махфӣ  нигоҳ доштани  ҷараёни тафтиш   зикр  карда  намешавад. Ҳамаи  онҳо ба  ҳабси  пешакӣ  гирифта шуданд  ва тафтиши  дафтари  амолашон   давом дорад.