СОҲИБКОРОНИ ТОҶИК БА УРДУН МЕРАВАНД Ё НЕ?

Душанбе,  2 феврал. (АМИТ «Ховар», Покиза  Маҳмадбекова). —   Аз  24  то  26  марти  соли   равон  дар  шаҳри  Уммони  Урдун намоишгоҳи  нӯҳуми  Русия  таҳти  унвони  «Экспо – Русия»  баргузор  мегардад.  Ташкилкунандагони  он  Ҷамъияти  саҳҳомии  «Зарубежэкспо»  шаҳри  Маскав,   анҷумани  байналмилалии  бунёди  сулҳ,  Палатаи  тиҷорати  Урдун ва Палатаи  тиҷоратии  саноатии  шаҳри  Ақаба   мебошанд. Дар ҷараёни  намоишгоҳ  дар  мавзӯи «Ҳамкории  иқтисодии  Русия, Урдун  ва  Ироқ»  конфронс  баргузор  мегардад. Намоишгоҳи  мазкур  бо  дастгирии  Вазорати  рушди  иқтисод  ва  тиҷорати  Русия, Палатаи  савдо ва  саноати  Русия,  Сафоратхонаи  Русия  дар  Урдун,  Сафоратхонаи  давлати  Ҳошимии  Урдун  дар  Федератсияи  Русия, Сафорати  Ироқ  дар  Русия, Шӯрои  тиҷоратии  Русия  ва  мамлакатҳои  араб,  Шӯрои тиҷоратии  Русия  ва  Урдун,  Палатаи  тиҷоратии  Урдун,  Палатаи  саноатии  Урдун,  Палатаи  тиҷоратию  саноатии  шаҳри  Ақаба,  Палатаи  тиҷоратию  саноатии  шаҳри  Бағдод  ва  вазоратҳои  соҳавии  Урдун  ва  Ироқ  гузаронида  мешавад. Ҳадафи  намоишгоҳ  ба  роҳ  мондани  равобити  мустақими   корхонаҳо  ва  соҳибкорони  Русия  ва  мамлакатҳои  араб,  вусъат  додани равобити  тиҷоратию  иқтисодии  Русия, Урдун,  Ироқ  ва  мамлакатҳои  дигари  араб,   ва  густариши  равобити  фарҳангӣ  мебошад. Бахшҳои  намоишгоҳ   дастовардҳои  мамлакатҳои  иштирокчии онро  дар  соҳаҳои   истихроҷи  нафту  газ,  энергетика,  мошину  дастгоҳсозӣ,  сохтмон,   коркарди  фулузот,  нақлиёт ва  алоқа,  техника,  химия, геология,  кишоварзӣ, технологияи  истифодаи  об,  татбиқи  навовариҳои  техникӣ  дар  соҳаҳои  гуногуни  иқтисодиёт,  тибб,  маориф ва  туризм  нишон  медиҳанд. Палатаи  савдо  ва  саноати  Ҷумҳурии  Тоҷикистон  корхонаю  муассисаҳо ва  соҳибкорони   мамлакатро  даъват  мекунад, ки   дар  намоишгоҳи  мазкур  ширкат  варзанд.  Маълумоти  иловагиро  дар  бораи  намоишгоҳ  аз Палатаи  савдо  ва  саноати  ҷумҳурӣ  ба  даст  овардан  мумкин  аст.