КУМАКИ ВАЗОРАТИ ТАНДУРУСТӢ БА НБО РОҒУН

Душанбе,  3 март. (АМИТ «Ховар», Ибодат Давлатова).-   Дирӯз гурӯҳи кории Вазорати тандурустии Ҷумҳурии Тоҷикистон таҳти сарварии муовини вазир Соҳибназар Раҳмонов ба назди сохтмончиёни нерӯгоҳи барқии обии Роғун бо сафари корӣ ташриф оварданд. Тавре аз маркази матбуоти Вазорати тандурустии ҶТ иттилоъ доданд, гурӯҳи корӣ аз шароити ҷойҳои кори сохтмончиён, ҷои хоби онҳо, фаъолияти бунгоҳҳои саломатӣ дидан карда, аз вазъи саломатии коргарон пурсон шуданд. Дар хизмати сохтмончиён як маркази саломатӣ ва чор бунгоҳи тиббӣ амал мекунад. Ҳамчунин ба наздикӣ як госпитали сайёр барои расонидани кӯмаки аввалияи тиббӣ ва гузаронидани ҷарроҳиҳои хурд аз ҷониби Вазорати тандурустӣ ба сохтмончиён тӯҳфа гардид. Сардори гурӯҳи корӣ, муовини вазири тандурустӣ Соҳибназар Раҳмонов изҳор намуд, ки «имрӯз як миқдори зарурии молҳои тиббӣ, ба монанди як дастгоҳи ташхиси фавқуссадо, 66 номгӯи дорувориҳо ва маводҳои мавриди истифодаи тиббӣ, як мошинаи «Ёрии таъҷилӣ», як миқдор занбарҳои тиббӣ, хулоса, ба маблағи 648 ҳазор сомонӣ ё худ зиёда аз 143 ҳазор доллар маводи доруворӣ ва таҷҳизоти тиббӣ барои кӯмак ба сохтмончиёни нерӯгоҳ оварда шуд. Ҳамзамон масъалаи сифати омода кардани ғизо, нуқтаҳои шустушӯӣ, беҳдоштӣ, манзили хоби сохтмончиён боздид гардида, барои бартараф кардани камбудиҳо маслиҳатҳо дода ва ёрии амалӣ расонида шуд».   Бояд қайд кард, ки ин иқдоми Вазорати тандурустӣ аввалину охирин нест ва чунин гурӯҳҳои корӣ доимо ба ҷои кори сохтмончиён сафар карда, ёрии амалии худро хоҳанд расонд.