МУКОФОТИ СММ БА ПРЕЗИДЕНТИ ТОҶИКИСТОН

Душанбе,  26 март. (АМИТ «Ховар»). —  Тавре  хабар дода шуда буд, Сарвазири  Ҷумҳурии  Тоҷикистон  Оқил  Оқилов   зимни   сафари  панҷрӯзааш ба Ню – Йорк  дар  маҷлиси  Маҷмаи  кулли  СММ  бахшида ба  масъалаҳои  марбут ба  сармоягузорӣ  бо  мақсади  рушди  иқтисодиёт  иштирок  дошт ва  сухан  кард. О.Оқилов  баъди   маҷлис   бо  Муншии  умумии  СММ  Пан  Ги  Мун  мулоқот  карда,  масъалаҳои  ҳамкории  Тоҷикистонро  бо   муассисаҳои  СММ,  вазъияти  минтақа  ва  ғайраро  мавриди  баррасӣ  қарор  дод.  Баъдан  маросими  супоридани  ҷоиза  барои  ба даст  овардани  Ҳадафҳои   рушди  ҳазорсола  дар  доираи  СММ  баргузор  гардид. Ҷоизаи  мазкур  имсол   ба  Президенти  Ҷумҳурии  Тоҷикистон  Эмомалӣ  Раҳмон  сазовор  дониста  шуд. Ҷоиза ҳар  сол  ба созмонҳо, муассисаҳои ғайридавлатӣ,  мактабҳои олӣ,  фондҳо ва  шахсони  алоҳида  супорида  мешавад, ки  барои  ба  даст  овардани  ҳадафҳои  ҳазорсолаи  СММ  саҳми  бузург  гузоштаанд. Ҷоизаи  Президенти  Ҷумҳурии  Тоҷикистон  ба  Сарвазири  мамлакат  Оқил  Оқилов  супорида шуд. Ӯ  баъдан ба  саволҳои  хабарнигорон  ҷавоб  дод.