МУЛОҚОТИ РОҲБАРОНИ КУМИТАҲОИ МИЛЛИИ ОЛИМПИИ МАМЛАКАТҲОИ ОСИЁ

Алмаато,  31 март. (АМИТ «Ховар», Наталя  Михайлова). —  Аз  29  то  31  марти  соли  равон  дар  шаҳри  Алмаато мулоқоти   роҳбарону  намояндагони  кумитаҳои  миллии   олимпии   мамлакатҳои  Осиё  баргузор  гардид.  Дар он  масъалаҳои  марбут ба  тайёрӣ  ба  Бозиҳои  7 – уми  зимистонаи  Осиёӣ   дар  соли  2011  муҳокима  карда шуданд. Бозиҳои  7 – уми  зимистонаи  Осиё  соли  оянда дар  Қазоқистон  баргузор мегарданд. Дар  мулоқот   роҳбарону  намояндагони  кумитаҳои  миллии  олимпии мамлакатҳои Осиё, Шӯрои олимпии  Осиё  ва  созмонҳои  дигари  мутасаддӣ  ширкат  варзиданд. Дар  он намояндагони  Кумитаи  миллии  олимпии  Тоҷикистон  низ  иштирок  доштанд.  Иштирокчиёни  мулоқот  дар  давоми  се  рӯз бо  нақшаҳои  тайёрӣ ба Бозиҳои  7 – уми  зимистонаи  Осиё,  аз  ҷумла  маҳалли  гузаронидани  мусобиқаҳо,  таҳқиқи саломатии  варзишгарон,  таъмини  амнияти  онҳо,  ташкили  фурӯши  чиптаҳо,  ҷалби  ихтиёриён  барои  хизматрасонӣ  дар  гузаронидани  бозиҳо  ва  ғайра  шинос  гардиданд. Бозиҳои  зимистонаи  7 – уми  Осиё  аз  30  январ то  6  феврали соли 2011  дар  шаҳрҳои  Остона  ва  Алмаато  баргузор  мегарданд. Барномаи онҳо  5 мусобиқаи  варзишӣ ва  11  намуди  қувваозмоиро  дар  бар  мегирад. Варзишгарони  мамлакатҳои  Осиё  аз  ҷумла  дар  намудҳои  конкитозӣ, рақси рӯи  ях,  чавгонбозӣ,  пойга  ба  воситаи  лижаҳо,  биатлон, ҷаҳиш бо  лижа  аз  баландӣ, тай  кардани  масофаи  муайян бо  лижа  ва  ғайра  қувваозмоӣ  мекунанд. Аз  рӯи  ҳисобҳои  пешакӣ  дар  бозиҳои  мазкур  варзишгарони  30  мамлакат  иштирок  хоҳанд  кард.