МУСОБИҚАИ САМБОЧИЁН ДАР МАСКАВ

Душанбе,  26 март. (АМИТ «Ховар»,  Пайрав  Назаров). —  25  март  дар  Маскав  мусобиқаи байналмилалии  гӯштини   самбо  бахшида ба  поси  хотири  варзишгари  машҳур  Анатолий  Харлампиев   кушода шуд. Аз  Тоҷикистон  дар  ин  мусобиқа   варзишгари тоҷик  Набимуҳаммад  Хоркашев  иштирок  дорад. Мухбири  АМИТ «Ховар»  хабар  медиҳад, ки   дар  мусобиқа   варзишгарони  сӣ  давлати  ҷаҳон,  аз  ҷумла  ИМА,  Фаронса,  Олмон, Италия, Финляндия,  Юнон, Марокаш, Венесуэла,  Куриё, Булғористон ва  ҳамаи  ҷумҳуриҳои  собиқи  Шӯравӣ  иштирок  мекунанд. Имсол  ҷоизаҳои  мусобиқа  дар бахшҳои «Техникаи  беҳтарини  гӯштингирӣ», «Барои  ирода ба  ғалаба» ва  ғайра  супорида  мешаванд. Анатолий  Харлампиев  аз  ҷумлаи  варзишгарони  машҳури  Русия  буда,  муддати  тӯлонӣ   сирру  асрори   навъҳои  гуногуни  гӯштини  миллиро   дар  ҷумҳуриҳои   шӯравӣ  таҳқиқ  карда  буд. Ӯ  яке  аз  асосгузорони   гӯштини  самбо  дар  Иттиҳоди  шӯравӣ  мебошад.  Бо ташаббуси  А.Харлампиев  дар  ҷамъиятҳои  варзишии  «Криля  Советов», «Динамо» ва Донишкадаи  энергетикии  Маскав  мактабҳои   махсуси  тарбияи  варзишгарон  кушода шуданд. Мусобиқаи  байналмилалии  самбочиён  барои  поси  хотири  варзишгари  машҳур  аз  соли  1982  сар  карда  гузаронида  мешаванд.  Соли  1983 ба он  мақоми  мусобиқаи  байналмилалӣ  дода шуд.