ОЛИМОНРО БА КОРХОНАҲОИ ИСТЕҲСОЛӢ МЕФИРИСТАНД

Душанбе, 12 март. (АМИТ «Ховар», Бекназари Абӯбакр). — Ҳар як корхона ва муассисаҳои  истеҳсолӣ дар шароити имрўзаи  тараққиёти илму технология ниёз ба илм ва коркардҳои илмии  олимон дорад. Аз ин рӯ, шароити кунунӣ тақозо мекунад, ки робитаи байни илму истеҳсолот беш аз пеш равнақ ёбад. Ин масъала дар мизи муаввари директорони пажўҳишгоҳҳои илмӣ-тадқиқотии самти илмҳои дақиқ, табиатшиносӣ ва техникии Академияи илмҳои Ҷумҳурии Тоҷикистон ва намояндагони ҳукумати шаҳри Душанбе баррасӣ гардид. Иштирокдорони ин мизи мудаввар ба хулоса омаданд, ки дар зинаҳои аввали равобит бояд гурўҳҳои корӣ ташкил гардида, олимон аз рўи тахассус ва самти фаъолияти худ ба корхонаҳои дахлдор равон карда шаванд, то заминаи ҳамкориҳоро дар сари коргоҳ бунёд гузоранд. Мушкилоте, ки дар корхона вуҷуд аст, бо чашми худ бубинанд ва роҳи ҳалли онро пешкаш намоянд. Дар мизи мудаввар ҳамчунин, роҷеъ ба масоили ба назар гирифтани талаботу пешниҳодот, ҷалби корхонаҳои хурд, институти иқтисодии АИ ҶТ дар ин самт, бунёди корхонаҳои муштараки таҷрибавӣ дар назди пажўҳишгоҳҳо, ки боиси коркарди маҳсулоти нав ва технологияи пешрав мегардад, табодули назар карда шуд.