САТҲИ ХУДТАЪМИНКУНИИ ЗАНОН БАЛАНД МЕГАРДАД

Душанбе, 16 март. (АМИТ «Ховар», Лаззат Диловарзод).-  Соли ҷорӣ дар ноҳияи Ваҳдат бинои  «Маркази занон» сохта ба истифода дода мешавад,- мегӯяд роҳбари ташкилоти ҷамъиятии «Сайёр» — и ноҳияи мазкур Гавҳар Хоҷаева. Бо мақсади сохтмони ин марказ   аз ҷониби ҳукумати Ҷопон 94, 055 доллари амрикоӣ ҷудо карда шудааст. Ташкилоти ҷамъиятии «Сайёр» ба заноне, ки дучори ҳолатҳои эҳтиёҷоти иҷтимоӣ гардидаанд ( ин поймолшавии ҳуқуқи занон, камбизоатӣ ва сатҳи пасти донишу малака аст, ки занонро ба сатҳи эҳтиёҷманди аҳолӣ оварда мерассонад), корҳои фаҳмондаиҳӣ мебарад. Тавассути лоиҳаи  сохтмони Марказ, бино  аз 8 ҳуҷра, аз ҷумла, ҳуҷраҳои маслиҳатдиҳӣ, касбомӯзӣ ва маҷлисгоҳ иборат мебошад. Дар  ин марказ баҳри рушди малакаи занон машғулиятҳои компютерӣ, омӯзиши забони англисӣ, касбҳои дӯзандагӣ ва кадбонугӣ ташкил меёбад. Ҳамчунин барои 123 ҳазор нафар занони ноҳия маслиҳатҳои ҳуқуқӣ дода мешавад, ки он ба сатҳи худтаъминкунии занон мусоидат менамояд.