АМАЛИЁТҲОИ НАВИ ТАБОБАТӢ ДАР ҶУМҲУРӢ

Душанбе,  15 апрел. (АМИТ «Ховар», Ибодат Давлатова).-   Дар давраи ҳисоботӣ дар муассисаҳои Вазорати тандурустӣ як қатор амалҳои нави табобат ҷорӣ карда шуд, дар ин бора  дар нишасти матбуотии Вазорати мазкур иттилоъ доданд.   Тавре намояндагони Вазорат қайд намуданд, бори аввал дар кишвар ба 11 нафар беморони дилу рагҳо амалиёти ҷарроҳӣ тавассути ҳуҷайраҳои бунёдӣ гузаронида шуд. Ҳамзамон, аввалин маротиба дар ҷумҳурӣ усулҳои нави ташхисӣ ба монанди ташхиси радиолоҷӣ бо истифодаи изотоп (синтиграфия) ва типкунонии иммунолоҷӣ, ба роҳ монда шуд, ҳол он, ки қаблан чунин беморон ба хориҷи кишвар равон карда мешуданд. Инчунин, дар доираи татбиқи стратегия ҳамбастагии бемориҳои кӯдакона бо дастгирии Агентии  байналмилалии Ҷопон ба маблағи 145081, 98 доллари ИМА  маводҳои доруворӣ ба ҷумҳурӣ ворид гардида, ба муассисаҳои тиббӣ тақсим гардиданд.