АНҶУМАНИ НАХУСТИНИ ОМӮЗГОРОНИ ИДМ АНҶОМ ЁФТ

Душанбе,  28 апрел. (АМИТ «Ховар»). —  27  апрел  дар  пойтахти  Ҷумҳурии  Қазоқистон – шаҳри  Остона  анҷумани  нахустини омӯзгорон ва  кормандони  соҳаи  маорифи  давлатҳои  ИДМ  ба охир  расид. Дар  анҷуман   кормандони  соҳаи  маорифи  қариб  ҳамаи  давлатҳои  ИДМ  ва  роҳбарону  намояндагони  вазоратҳои  маорифи  мамлакатҳои  Иттиҳод  иштирок  намуданд. Ҳайати  Тоҷикистон  дар  Анҷуман  таҳти роҳбарии  вазири  маориф  Абдуҷаббор  Раҳмонов  ширкат  варзид. Ба  ақидаи  коршиносони  хориҷӣ,  анҷумани омӯзгорони  мамлакатҳои  ИДМ  дар  амалӣ  сохтани нақшаҳои  ҳамкорию  ҳамгироӣ, иваз  кардани таҷриба   ва  пешрафти  соҳа  нақши  муҳим  мебозад.   Тибқи  пешниҳоди  иштирокчиёни  анҷуман, ояндаи  наздик  унвон  ва  нишони  ифтихории «Аълочии  маорифи ИДМ» таъсис   дода  хоҳанд  шуд.               Қарор  дода шуд, ки минбаъд  анҷуманҳои омӯзгорони  мамлакатҳои  ИДМ  ҳар  ду  сол  як  маротиба  гузаронида шавад. Анҷумани оянда  соли  2012  дар   шаҳри  Ереван баргузор  мегардад.