БОНКҲО БА РУШДИ СОҲИБКОРӢ ХУШБИН НЕСТАНД

Душанбе, 12 апрел. (АМИТ «Ховар», Лаззат Диловарзод).- Бонкҳо дар доираи оинномаи худ мустақиланд ва дахолати ниҳодҳои давлатӣ  дар кори бонкдорӣ хилофи қонун дониста мешавад. Ин аст, ки бо вуҷуди таъкидҳои  пайвастаи Сарвари давлат оид ба рушди соҳибкорӣ,  онҳо аз ҷониби  бонкҳои     ватанӣ хуб дастгирӣ намеёбанд. Онҳое, ки мехоҳанд ба кори соҳибкорӣ машғул бошанд, сармояи дуруст надоранд. Дарёфти маблағ аз бонкҳо кори саҳлу осон нест, зеро шарту шароити пешгузоштаи бонкҳои ҷумҳурӣ ба рушди соҳибкорӣ имкон намедиҳад. Якум ин ки бонкҳо барои қарзи яксола аз соҳибкор амволашро ба гарав мегиранд ва дар сурати баргардонида натавонистани қарз соҳибкор аз амволи худ маҳрум мегардад. Дуюм фоизи қарзи бонкӣ дар Ҷумҳурии Тоҷикистон хеле баланд аст, ки он ба рушди схибкорӣ монеа мешавад. Таҷрибаҳо нишон медиҳанд, ки дар ҷумҳуриҳое, ки фоизи қарзи бонкӣ кам аст, соҳибкорӣ рушд кардааст. Чӣ бадӣ дорад, агар таҷрибаи дигар ҷумҳуриҳо дар Тоҷикистон дасгирӣ ёбаду соҳибкорони ватанӣ даҳчанд зиёд гарданд.