ЧАРО ТАЛОҚ РӮ БА АФЗОИШ АСТ?

Душанбе, 23 апрел. (АМИТ «Ховар», Бекназари Абӯбакр). — Дар давоми се моҳи аввали соли ҷорӣ дар ҷумҳурӣ бекор кардани ақди никоҳ ё талоқ нисбат ба ҳамин давраи соли гузашта 145 адад афзудааст. Дар давоми семоҳаи якуми соли 2009 бекор кардани ақди нигоҳ 1512 адад ба қайди давлатӣ гирифта шуда бошад, пас дар ҳамин давраи соли ҷорӣ ба 1657 адад расидааст. Вазири адлияи Ҷумҳурии Тоҷикистон Бахтиёр Худоёров имрӯз, 23 апрел зимни нишасти матбуотӣ сабабҳои афзоиши талоқро шарҳ дода, гуфт, ки сабабҳои аслии ҷудошавии зану шавҳар бефарзандии онҳо мебошад. Дигар сабабҳояш, мутобиқ наомадани хислатҳои зану шавҳар, бемории яке аз ҷонибҳо, дахолати волидайн ва шояд талоқи мусулмонӣ ҳам бошад. Б. Худоёров роҷеъ ба паҳлӯҳои дигари фаъолияти вазорат маълумот дода, зикр намуд, ки дар давраи ҳисоботӣ 61 ташкилоти ҷамъиятӣ ба қайд гирифта шуда, фаъолияти 2 ташкилоти ҷамъиятӣ қатъ карда шуд. Аз ҷумла, бинобар сабаби риоя накардани талаботҳои Қонуни ҶТ «Дар бораи забони давлатии Ҷумҳурии Тоҷикистон» ва баромадан аз салоҳияти дар низомномаҳояшон дарҷгардида, фаъолияти ташкилотҳои ҷамъиятии Бунёди хайрияи «Дасти мадад» ва «Ҳаёти ҷавонон» тавассути судҳо манъ гардид. «Вазорат қаблан ин ташкилотҳоро огоҳ намуда буд, ки ба қонуншиканӣ роҳ надиҳанд, вале аз ҷониби онҳо ин огоҳнома ба инобат гирифта нашуда, ҳуҷҷатгузориҳояшон бо забони давлатӣ, яъне тоҷикӣ сурат нагирифт. Инчунин, ин ташкилотҳо ба фаъолиятҳое машғул шуданд, ки аз доираи салоҳият ва муқаррароти низомномаашон берун буд», — тазаккур дод вазир. Гуфтанист, ки ҳалномаи Бунёди хайрияи «Дасти мадад» ба қувваи судӣ даромада, тафтиши парвандаи «Хаёти ҷавонон» дар ҳоли баррасӣ қарор дорад.