240 НУҚТАИ БОРДОРКУНИИ ЧОРВО

Душанбе, 12 май. (АМИТ «Ховар», Лаззат Диловарзод).- Бино ба гуфти сардори Раёсати чорводории Вазорати кишоварзӣ Б. Мирзоев, яке аз роҳҳои асосии беҳтар намудани зоти чорво ва дар ин замина баланд бардоштани маҳсулнокии он  бордоркунии сунъӣ мебошад. Ба гуфти ҳамин манбаъ, айни замон дар се вилояти ҷумҳурӣ 240 нуқтаи бордоркунии сунъии  чорвои калон мавҷуд аст, ки 81 нуқтаи он дар сектор   (соҳа) –и ҷамъиятӣ  ва 159 нуқта дар сектори  хусусӣ фаъолият доранд. Дар ҳамаи ин 240 нуқта 2933 сар чорвои калон бо тарзи сунъӣ бордор карда шудааст, ки 1214 сари он ба сектори хусусӣ тааллуқ дорад. Ба гуфти сардори Раёсати чорводории вазорат, саршумори чорвои бо роҳи сунъӣ бордошуда нисбат ба ҳамин давраи соли 2009 516 сар зиёд гардид. Аз чорвои бо роҳи сунъӣ бордоршуда то моҳи майи соли ҷорӣ 1400 сар гӯсола гирифта шудааст.