ДАВЛАТҲОИ ИДМ БА ҲАМДИГАР КӮМАКИ ҲАРБӢ МЕРАСОНАНД

Маскав,  28 май. (АМИТ «Ховар»). – Шӯрои  Федератсияи  Русия  26  май  қонуни  федералиро «Дар  бораи  тасвиби  протоколи  ташкили  ҳамкории   ҷузъу  томҳои  марзбон  ва  сохторҳои  дигари   давлатҳои  аъзои  ИДМ  дар  масъалаи   расонидани  кӯмак  ба  ҳамдигар   зимни  ба  вуҷуд  омадани  вазъияти  бӯҳронӣ  дар   минтақаи  сарҳад» маъқул  донист. Қонун  бо  аксарияти  кулли  овозҳо   тасдиқ  карда  шуд.  Мамлакатҳои  аъзои  Иттиҳоди  Давлатҳои  Мустақил  паймон  карданд, ки минбаъд  дар  мавриди  рух  додани  вазъияти  бӯҳронӣ  дар  минтақаи  сарҳад  ба  ҳамдигар  кӯмаки  ҳарбӣ  расонанд.  Протоколи  мазкурро  сарони  давлатҳои  Русия,  Арманистон, Белорусия, Қазоқистон, Қирғизистон  ва  Тоҷикистон  моҳи  октябри  соли  2007   имзо  карда буданд.  Белорусия  изҳор  намуд, ки  ҷузъу  томҳои  марзбон  ва   воҳидҳои  дигари  низомии  худро  ба  қаламрави  мамлакатҳои  дигар   нахоҳад  фиристод. Дар  ҳуҷҷат  асосҳои   ташкил   ва   роҳу  воситаҳои  ҳамкории  қувваҳои  низомии   мамлакатҳои  аъзои  ИДМ  дар  мавриди  рух  додани  вазъияти  бӯҳронӣ  муайян  карда  мешавад.   Ҳамчунин  тартиби   анҷом  додани тадбирҳои  муштарак,  ҳалли  масъалаҳои баҳснок,  мақоми   ҷузъу  томҳои  ҳарбӣ  ва  вазъияти  ҳуқуқии  фаъолияти онҳо   мувофиқа  карда  шуданд.  Қайд  карда  мешавад, ки  мамлакатҳои  дигар  ба  протоколи  мазкур   ҳамроҳ  шуда  метавонанд.