КӮМАКИ ҲУКУМАТИ ИМА БА ЗАРАРДИДАГОН

Душанбе,  19 май. (АМИТ «Ховар», Фарангис  Раҳимова). —  Ҳукумати  Иёлоти  Муттаҳидаи  Амрико  бо  хоҳиши  Ҳукумати  Ҷумҳурии  Тоҷикистон  ба  сокинони   аз  фалокати табиӣ  зарардидаи  минтақаи  Кӯлоби  вилояти  Хатлон   ба  маблағи зиёда  аз  588 ҳазор  доллар   кӯмаки  башардӯстона  расонд. Бо  ин  маблағ  ба  зарардидагон  теъдоди  зиёди  хаймаҳо,  асбобу  анҷоми  санитарӣ ва  асбобу  анҷоми  заруртарини  рӯзгор  тӯҳфа  карда шуд.  Кӯмаки башардӯстона  ба  аҳолии  аз  боришҳо  зарардидаи  ноҳияҳои  Кӯлоб,  Восеъ,  Темурмалик,  Мӯъминобод,  Ховалинг,  Шӯрообод,  Балҷувон,  Шаҳритус ва  Ҷилликӯл  расонида шуд. Тавре  хабар  дода шуда буд,  бар  асари  боришҳои  тӯлонӣ,  омадани  сел ва  обхезӣ  дар  ин  ноҳияҳо  22  нафар   ҳалок  гардида,  бештар  аз 200  нафар   маҷрӯҳ  шуд,  50  нафари  дигар  бе  ному  нишон  гум шуда,  зиёда  аз  4000  нафар  бесарпаноҳ  монд.