МАҶЛИСИ ШӮРОИ РОҲБАРОНИ НАҚЛИЁТИ РОҲИ ОҲАНИ ИДМ

Душанбе,  17 май. (АМИТ «Ховар»,  Кристина  Эрлих). —  Дар  шаҳри Юрмалаи  Латвия  маҷлиси  52  юми  Шӯрои роҳбарони  муассисаҳои  нақлиёти  роҳи  оҳани  давлатҳои  аъзои  ИДМ  ба  охир  расид.  Аз  Тоҷикистон  дар  маҷлиси  мазкур  сардори  Корхонаи  воҳиди давлатии  муассисаи   роҳи оҳани  мамлакат   Амонулло  Ҳукумов  ва   муовини  аввали  ӯ  Владимир  Собкалов  ширкат  варзиданд. Шӯрои  мазкур  17 муассисаи   роҳи оҳани   мамлакатҳои  аъзои  ИДМ,   соҳили  баҳри  Балтик,  Гурҷистон,  Булғористон  ва  Финляндияро  муттаҳид  месозад.  Вазифаи он  таъмини  ҳамкории  техникию  иқтисодӣ, молиявӣ  ва  халли  масъалаҳои  ҳуқуқии  фаъолияти  ин  муассисаҳо  мебошад. Шӯро  дар  сатҳи  байнидавлатӣ фаъолияти   нақлиёти  роҳи  оҳанро  ба  низом  дароварда,  принсипҳои  ҳамкориро  мувофиқа  намуда,  роҳу  воситаҳои  то  ҳадди  имкон  кам  кардани   монеаҳои  сунъии  ҳамлу  нақли  молро   дар  байни  мамлакатҳо  муайян  месозад. Маҷлиси  пештараи  Шӯрои  мазкур   моҳи  октябри  соли  2009  дар  Ӯзбекистон  баргузор  гардида буд.