НАФАҚА БО КОРТҲОИ ПЛАСТИКӢ ПАРДОХТ МЕГАРДАД

Душанбе, 21 май. (АМИТ «Ховар», Покиза Махмадбекова). – 21 майи соли равон дар бинои Бонки Милли Тоҷикистон вохӯрӣ бо намояндагони ташкилоту созмонҳои байналмиллаливу хориҷии донорӣ ҷиҳати рушди минбаъдаи соҳаи меҳнат ва ҳифзи иҷтимоии аҳолӣ дар Тоҷикистон бо ибтикори Вазорати меҳнат ва ҳифзи иҷтимоии аҳолии Ҷумҳурии Тоҷикистон баргузор гардид. Вохӯрии мазкур дар доираи иҷрои вазифаҳои дар Паёми апрели Президент ба Маҷлиси Олии Ҷумҳурии Тоҷикистон, ҷиҳати дастгирӣ ва рушди соҳибкорӣ, ҳифзи иҷтимоии аҳолӣ,рушди бозори меҳнат ва тақвияти нерӯи инсонӣ доир гашта, бо мақсади ҷалби инвеститсияи хориҷӣ баҳри амалӣ намудани корҳои дар боло зикрёфта, гузаронида шуд. Дар вохӯрӣ Бонки давлатии амонатгузории Ҷумҳурии Тоҷикистон «Амонатбонк» ҳамчун яке аз созмондиҳандагони вохӯрӣ ширкат карда, дар ҷараёни баргузории он Раиси Раёсат Гулнора Ҳасанова бо маърӯза дар мавзӯи «Пардохти нафақа тавассути кортҳои бонкӣ» баромади пурмӯҳтаво намуд. Г. Ҳасанова дар баромади худ афзуд, ки «БДА ҶТ «Амонатбонк» дар баробари дигар хизматрасониҳои анъанавии бонкдорӣ ба як қаттор хизматрасониҳои дигар, аз қабили пардохти нафақа ва ҷубронпӯлиҳои аҳолӣ, қабули маблағҳои коммуналӣ, ҷойгиркунии кӯмак ва ёрдампулиҳо ба навоҳӣ ва минтақаҳои офатзада ва амсоли инҳо барин фаъолииятҳоро амалӣ месозад, ки ба соҳаи ҳифзи иҷтимоии аҳолӣ марбут мебошанд. Яке аз иқдомҳои афзалиятноки ин самти фаъолияти Бонк, ки имрӯзҳо ҷиҳати рушди он кӯшиш ва заҳмати зиёд харҷ мешавад, ин иҷрои барномаи пардохти нафақаи аҳолӣ бо кортҳои плостикӣ мебошад.»  .