ТАШРИФИ ВАЗИРИ МУДОФИАИ ЭРОН БА ТОҶИКИСТОН

Душанбе,  11 май. (АМИТ «Ховар»,  Фирдавс  Таваров). —  12  май  ҳайати  Вазорати  мудофиаи  Ҷумҳурии  Исломии  Эрон  таҳти роҳбарии вазири  мудофиа  ва  дастгирии   қувваҳои  мусаллаҳи  ин  мамлакат,  генерал  Аҳмади  Воҳидӣ  барои  боздиди  расмӣ  ба  Тоҷикистон  меояд. Тибқи  нақша  вазири  мудофиаи  Эрон  ва  ҳамроҳонаш бо  Президенти  Ҷумҳурии  Тоҷикистон  Эмомалӣ  Раҳмон  мулоқот  хоҳанд  кард.  Онҳо  инчунин  бо  шахсони дигари расмӣ  ва  мансабдорони  баландпояи  Тоҷикистон мулоқоту  вохӯриҳо  анҷом  доданианд. Дар  ҷараёни  ин  мулоқотҳо  маҷмӯи  масъалаҳои  марбут ба  ҳамкории  ҳарбӣ  ва  низомию  техникии  Тоҷикистону  Эрон  ва  вусъати  ҳамкории  ҳар  ду  мамлакат  дар  ин  соҳа  баррасӣ  карда  хоҳанд  шуд. Мухбири  АМИТ «Ховар»  ёдовар  мешавад, ки   вазоратҳои  мудофиаи  Тоҷикистону  Эрон  аз  соли  1997  инҷониб  ҳамкорӣ мекунанд.