ОББОЗӢ КАРДАН ХАТАРНОК ШУД

Душанбе, 25 июн. (АМИТ «Ховар», Жасмин Назарова). — Рӯзи 23 июни соли равон ҳангоми оббозӣ дар ҳавзи «Мехкарер»-и деҳаи Чимтеппа, истиқоматкунандаи ҷамоати деҳоти Алмосии ноҳияи Ҳисор, Тиллоев Меҳроҷиддин, соли таваллудаш 1992, аз беэҳтиётӣ ғарк шуд. Тавре ба хабарнигори АМИТ «Ховар» аз маркази матбуоти Кумитаи ҳолатҳои фавқулодда ва мудофиаи граждании назди Ҳукумати ҶТ Дустмурод Забиров иттилоъ дод, ҷасади М. Тиллоевро аз тарафи наҷотдиҳандагони Кумита худи ҳамон рӯз дарёфт карданд. Боиси тазаккур аст, ки аз аввали мавсими гармиҳо дар ҷумҳурӣ якчанд ҳодисаҳои ғарқшавии шаҳрвандон ба қайд гирифта шудааст. Бинобар ин, Кумита аз шаҳрвандони Тоҷикистон тақозо дорад, ки барои ҳимояи ҳаёти шахсии худ ва наздиконашон ҳангоми истироҳат ва шиноварӣ дар наздикии дарёҳо ва обанборҳо қоидаҳои бехатариро риоя намуда, аз оббозӣ дар ҷойҳои манъшуда ва дарёҳои тезҷараён худдорӣ кунанд, — гуфт Д. Забиров.