БАРРАСИИ ПЕШНИҲОДИ ИНТИХОБКУНАНДАГОН

Хуҷанд, 20 сентябр. (АМИТ «Ховар», Санавбар Мақсудова). -17 сентябр вакили Маҷлиси намояндагони Маҷлиси Олии кишвар Домуллоҷон Ҷабборов аз ҳавзаи интихоботии рақами 13-и шаҳри Хуҷанд интихобкунандагонро дар бинои маъмурии шаҳри Хуҷанд қабул намуд. Аз номи зиёда аз шашсад сокини маҳаллаҳои Содирхон Ҳофиз, Тути Калон, Чорчироғ, Инқилоб, Раззоқ, қасабаи ҳаштум, ҳамчунин, комбинати омӯзишӣ-истеҳсолии нобиноёни шаҳр ба қабули вакили халқ қариб 20 нафар интихобкунандагон омаданд. Истиқоматкунандагони шаҳр асосан оид ба масъалаҳои ҷудо намудани қитъаи замин барои бунёди сохтмони хонаи истиқоматӣ, таъмири роҳ, имтиёз барои андозбандӣ ва таъмири ёдгориҳои таърихӣ муроҷиат намуданд. «Ҳамаи масъалаҳое, ки интихобкунандагон пешниҳод намуданд, дар мӯҳлати наздик дар якҷоягӣ бо мақомоти иҷроияи ҳокимияти давлатии шаҳри Хуҷанд ва дар ҳамдастӣ бо вазорату идораҳои марбута ҳалли худро меёбанд», — гуфт дар сӯҳбат ба хабарнигори АМИТ «Ховар» вакили Маҷлиси намояндагони Маҷлиси Олии кишвар  Домуллоҷон Ҷабборов.