ҲИМОЯТ АЗ ҲУҚУҚҲОИ МУҲОҶИРОН

Душанбе, 18 октябр.(АМИТ «Ховар», Марзия Саидова).-Имрӯз дар шаҳри Душанбе нишасти намояндагони Комиссияи доимии  Ассамблеяи байнипарлумонии  кишварҳои аъзои Иттиҳоди иқтисодии ЕврАзЭС  оид ба сиёсати иҷтимоӣ оғоз шуд.      Раиси Маҷлиси намояндагони Маҷлиси Олии ҷумҳурӣ  Шукурҷон Зуҳуров  онро қадами устуворе  ҷиҳати тақвияти  ҳамкориҳои иқтисодию иҷтимоӣ миёни ин кишварҳо арзёбӣ кард. Вай иброз дошт, ки  бояд Иттиҳоди иқтисодии ЕврАзЭС  дар ҳалли масъалаи вобаста ба муҳоҷирини меҳнатӣ  иқдоми ҷиддиро рӯи даст бигирад ва дар мавриди  ҳифзи ҳуқуқҳои муҳоҷирини меҳнатӣ талошҳои муассирро анҷом диҳад. Хусусан Ш. Зуҳуров фароҳам овардани шароити  мусоиди кору зиндагӣ барои муҳоҷирони меҳнатӣ дар кишварҳои Русия ва Қазоқистонро афзалиятнок арзёбӣ кард.     Дар нишаст, котиби масъули Комиссияи доимии Ассамблеяи байнипарлумонии кишварҳои узви Иттиҳоди иқтисодии ЕврАзЭС оид ба сиёсати иҷтимоӣ Петр Зверов иброз дошт, ки баргузории нишаст дар кишвари офтобии Тоҷикистон  дар мавриди қабули қарорҳои вобаста ба ҳалли мушкилоти  байни кишварҳои аъзои он нақши муассир мегузорад.      Иштирокдорони нишаст масъалаҳои марбут ба таҳкими ҳамкориҳои байнипарлумонӣ ва соири масоили муҳими равобити ҳасанаи кишварҳои аъзои ЕврАзЭС-ро баррасӣ карданд.