82 ҲОДИСАИ НАҚЛИЁТӢ БО ИШТИРОКИ НОБОЛИҒОН

            Қурғонтеппа, 25  октябр. (АМИТ "Ховар", Мурод Сотиев)  — Аз 19 то 29 октябри соли ҷорӣ дар роҳҳои вилояти Хатлон амалиёт таҳти шиори «Бачагон» гузаронида мешавад.             Бино ба гуфтаҳои нозири калони давлатии шӯъбаи тарғибот ва назорати Нозироти давлатии вилояти Хатлон Ёрмаҳмад Давлатов, амалиёт бо мақсади пешгирии садамаҳои нохуши нақлиётӣ бо иштироки бачагон ва ноболиғон гузаронида мешавад.          Дар чаҳорчӯби ин амалиёт вохӯриҳо дар мактабҳои таълимоти умумии вилоят низ доир мегарданд. Ҳамчунин, барномаҳои телевизионӣ бо иштироки бачагон омода мегарданд.              Тибқи маълумоти нозироти давлатии вилояти Хатлон аз оғози сол дар Хатлон 310 садамаи нохуши нақлиётӣ рух дод, ки дар натиҷаи он 108 нафар ба ҳалокат расида, 235 нафари дигар ҷароҳатҳои гуногун бардоштанд.            82 садамаи нохуши нақлиётии бо иштироки бачагон ва ноболиғон ба амал омада аз ин ҳисобанд.