АФЗОИШИ САРМОЯИ МУСТАКИМ БА ИКТИСОДИЁТИ ТОҶИКИСТОН

Душанбе, 26 октябр. (АМИТ «Ховар», Бекназари Абӯбакр). — Имрӯз дар Ҷумҳурии Тоҷикистон 57 лоиҳаи сармоягузории ҳукуматӣ татбик шуда истодааст, ки маблағи умумии онҳо 1 миллиарду 913 миллион доллари ИМА-ро ташкил медиҳад. Дар ин бора зимни нишасти матбуотӣ, 26 октябр муовини аввали раиси Кумитаи давлатии сармоягузорӣ ва идораи амволи давлатии ҶТ Саидқул Эшонқулов иттилоъ дод. Ӯ афзуд, ки лоиҳаҳои сармоягузории мазкур асосан аз 20 манбаъ маблағгузорӣ шуда, зиёда аз 16 соҳаи мухталифи иқтисодӣ ва иҷтимоиро дар бар мегиранд. Дар таркиби лоиҳаҳои сармоягузории Ҳукумати Ҷумҳурии Тоҷикистон маблағҳои қарзӣ — 74,74%, грантӣ — 14,83%, ҳиссаи Ҳукумати ҶТ – 7% ва ҷамоаҳо – 3,35% аст. Мавриди зикр аст, ки дар давоми 6 моҳи соли ҷорӣ зиёда аз 436 миллион сомонӣ сармояи мустақим ба иқтисодиёти кишвар ворид гардидааст, ки ин нишондод нисбат ба ҳамин давраи соли гузашта 201 миллион сомонӣ зиёд мебошад. Дар давоми нӯҳ моҳи соли 2010 аз ҳисоби хусусигардонӣ ва истифодаи моликияти ҷумҳуриявӣ ба буҷети ҷумҳурӣ 31,7 миллион сомонӣ ворид гардид, ки нисбат ба ҳамин давраи соли 2009-ум 18,2 миллион сомонӣ зиёд аст.