МАРКАЗИ ФАРОГИРӢ БО ШУҒЛ

Душанбе, 13 октябр. (АМИТ «Ховар», Дилшодаи Ҷонмард).-  Тавре аз шӯъбаи робитаҳои байналмилалӣ ва ҷамъиятии Агентии давлатии ҳифзи иҷтимоӣ, шуғли аҳолӣ ва муҳоҷирати Вазорати меҳнат ва ҳифзи иҷтимоии аҳолии Ҷумҳурии Тоҷикистон  иттилоъ доданд, яке аз самтҳои асосии фаъолияти Агентӣ оид ба татбиқи сиёсати давлатӣ дар соҳаи муҳоҷират ва муносибатҳои байналмилалии соҳавӣ ва ҷамъиятӣ таҳияи чорабиниҳо ва барқарории муносибатҳои дӯстона ва ҳамкориҳои мутақобилан судманд бо ташкилотҳои байналмилалӣ мебошад.     Бо мақсади татбиқи ҳамкории байналмилалӣ дар соҳаҳои муҳоҷирати меҳнатӣ  Агентии давлатии ҳифзи иҷтимоӣ, шуғли аҳолӣ ва муҳоҷират дар ҳамоҳангӣ бо Агентӣ оид ба ҳамкорӣ ва рушди техникӣ (ACTED) Меморандум оид ба ҳамкориро ба имзо расонид.     Бо назардошти фаъолияти якҷоя ҷиҳати таъсис додани Маркази реинтегратсия дар сохтори Агентӣ қарор аст, ки рӯзи 21 октябри соли равон маросими ифтитоҳии ин Марказ доир гардад.      Марказ дар рушди иҷтимоӣ ва касбии реинтегратсионӣ, баҳодиҳии  малакаи касбӣ, бо шуғл фарогирӣ, дастгирӣ барои пешбурди тиҷорат, рушд ва дастгирии дигар барномаҳое, ки  дар мавриди бозгашти муҳоҷирони меҳнатӣ шароити мусоидро фароҳам меоранд, саҳм гузошта, ҷиҳати беҳтар шудани раванди кор бо муҳоҷирони  ба Ватан баргашта  мусоидат менамояд.