ТАҒЙИРУ ИЛОВАҲО БА ҚОНУНИ КОНСТИТУТСИОНӢ

Душанбе, 25 октябр.(АМИТ «Ховар», Марзия Саидова).- 25 октябр таҳти раёсати муовини аввали Раиси Маҷлиси намояндагони Маҷлиси олии Ҷумҳурии Тоҷикистон Амиршо Миралиев ҷаласаи Шӯрои Маҷлиси намояндагон баргузор гардид.           Аз маркази матбуоти палатаи поёнии парлумони мамлакат ба АМИТ «Ховар» иттилоъ доданд, ки дар Шӯро лоиҳаи Қонуни коститутсионии Ҷумҳурии Тоҷикистон «Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон «Дар бораи Маҷлиси Олии Ҷумҳурии Тоҷикистон», лоиҳаҳои Қонунҳои Ҷумҳурии Тоҷикистон «Дар бораи маҳдуд намудани истифодаи маҳсулоти тамоку», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи бақайдгирии давлатии дактилоскопӣ», «Дар бораи фаъолияти китобдорӣ», «Дар бораи маърифати экологии аҳолӣ» баррасӣ шуданд. Инчунин, Ёддошти тафоҳум байни Ҳукумати Ҷумҳурии Тоҷикистон ва Ҳукумати Ҷумҳурии Исломии Эрон дар бораи кӯмаки рушди Ҷумҳурии Исломии Эрон ба Ҷумҳурии Тоҷикистон, Дар хусуси Созишнома байни Ҳукумати Ҷумҳурии Тоҷикистон ва Комиссияи Ҷомеаи Аврупо дар бораи ифтитоҳ, имтиёз ва масъуниятҳои намояндагии Комиссияи Ҷомеаи Аврупо дар Ҷумҳурии Тоҷикистон, Дар бораи таъсиси гурӯҳи корӣ оид ба лоиҳаи Қонуни Ҷумҳурии Тоҷикистон «Дар бораи матбуот ва дигар воситаҳои ахбори омма» ва «Дар хусуси тамдиди мӯҳлати баррасии лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи амният» мавридии баҳсу баррасии аъзои Шӯро қарор гирифтанд.    Зикр шуд, ки мақсад аз пешниҳоди лоиҳаҳои қонунҳои мазкур ба палатаи поёнии парлумон такмил ва мутобиқ намудани онҳо ба қонунҳои амалкунанда, баланд бардоштани дониш ва маърифати экологии аҳолӣ, ҳифзи саломатӣ ва густариши ҳамкориҳои Ҷумҳурии Тоҷикистон бо кишвару созмонҳои бонуфузи хориҷиву байналмилалӣ мебошад.Қисме аз масъалаҳо барои баррасӣ ба ҷаласаи навбатии иҷлосияи дуюми Маҷлиси намояндагон ва қисми дигар барои додани хулосаи экспертизаи ҳуқуқӣ ба Шӯъбаи ҳуқуқи Дастгоҳи Маҷлиси намояндагон пешниҳод гардиданд.