ВАҚТЕ КИ 65 ФОИЗИ ТЕХНИКА КОРШОЯМ АСТ

Душанбе, 6 октябр. (АМИТ «Ховар». Лаззат Диловарзод).- Маълумоти оморӣ дар моҳи августи соли ҷорӣ  нишон дод, ки 65 фоизи техникаи кишоварзӣ дар ҳолати коршоямӣ қарор дорад.    То 1 –уми сентябри соли ҷорӣ дар корхонаҳои кишоварзӣ ва хоҷагиҳои деҳқонӣ — фермерӣ 13 ҳазору 885 адад тракторҳои гуногунтамға мавҷуд аст, ки аз он ҳамагӣ 9 ҳазору 12 ададашон дар ҳолати коршоямӣ қарор доранд, ки ин   65 фоизи  умумии тракторҳои коршоямро дар 32 ҳазор хоҷагиҳои деҳқонӣ — фермерӣ ташкил медиҳад.    Бояд тазаккур дод, ки ин омодагӣ аз ҳисоби миёнаи ҷумҳурӣ дар як қисми ноҳияҳо  боз ҳам камтар аст. Аз ҷумла  дар хоҷагиҳои вилояти Хатлон 62 фоиз, ноҳияҳои Нуробод – 17, Варзоб – 43, Турсунзода – 48, Файзобод – 49, Шаҳринав- 53, Ҷиргатол – 61 ва дар Ваҳдат низ 61 фоиз омодагии техникӣ ба ҳисоб гирифта шудааст ва ин мазмуни онро дорад, ки дар чунин ҳолат қарор доштани техника кишти тирамоҳӣ дар ҳеҷ сурат ҳам 100 фоиз анҷом дода нахоҳад шуд. Аз ин рӯ барои лоақал 80 – 85 фоиз омода кардани техника барои корҳои тирамоҳӣ ҳанӯз вақт ҳаст, фақат ташаббус ва амал даркор.