ДУ КИШВАРИ ҲАМЗАБОН ҲАМКОРИҲОРО ТАҚВИЯТ МЕДИҲАНД

        Душанбе, 30 ноябр.(АМИТ «Ховар», Марзия Саидова).-  Шукурҷон Зуҳуров Раиси Маҷлиси намояндагони Маҷлиси Олии ҷумҳурӣ зимни сафари расмии худ ба Эрон  дар Теҳрон бо Раиси гурӯҳи дӯстии  Маҷлиси Шӯрои Исломии Ҷумҳурии Исломии Эрон доктор Наҷотбахш мулоқот анҷом дод. Дар ин хусус ба АМИТ «Ховар» котиби матбуотии Маҷлиси намояндагони Маҷлиси Олии ҷумҳурӣ Муҳаммадато Султонов аз Теҳрон иттилоъ дод.                                     Шукурҷон Зуҳуров гуфт, ки сафари ҳайати парлумонии Тоҷикистон ба Эрон ба муносибатҳои дуҷонибаи парлумонии ҳарду кишвар бояд заминаи устувор гузорад.             «Имрӯз вақти он расидааст, ки фаъолияти гурӯҳҳои дӯстиро ҳар ду ҷониб ҷоннок намоянд», афзуд Ш. Зуҳуров.             Дар ҷараёни мулоқот масъалаи таҳкими ҳамкориҳо байни гурӯҳҳои дӯстии парлумонҳои ҳар ду кишвари дӯсту ҳамзабон -Тоҷикистону Эрон баррасӣ шуд.           Зикр гардид, ки боздиди ҳайати гурӯҳҳои дӯстии парлумонҳои Тоҷикистону Эрон аз кишвар ва парлумонҳои якдигар, ба омили муҳими тақвияти дӯстӣ ва таҳкими муносиботи байнипарлумонӣ мусоидат менамояд. Дар мулоқот  бештар намудани боздидҳои ин гурӯҳҳо аз парлумонҳои якдигар ва истифодаи таҷрибаи ҳамдигар дар самти таҳия ва қабули қонуну қарорҳо таъкид гардид.             Дар фарҷоми мулоқот ҷонибҳо ба тавофуқ расиданд, ки мавридҳои рафту омади намояндагони гурӯҳҳои дӯстӣ ба кишварҳои ҳамдигарро бештар намоянд ва дар ин замина шароити боз ҳам наздик шудани ҳамкориҳои дуҷонибаро фароҳам созанд.