ГАНДУМИ БА ШАРОИТИ ПОМИР МУВОФИҚ

      Душанбе, 24 ноябр. (АМИТ «Ховар», Лаззат Диловарзод).- Бино ба маълумоти пойгоҳи илмию тадқиқотии кишоварзии Помир, дар асоси таҷрибаи дар соли 2009 -2010 гузаронидаи олимон муайян   шуд, ки дар ноҳияи Рӯшон гандуми навъҳои «Стекловидная -24» ва «Атоӣ» дар баландии 1800 метр аз сатҳи баҳр ба зимистони қаҳратуни ин мавзеъ тоб оварда метавонад. Олимон дар 5 га замин тирамоҳи соли 2009 ин навъҳои гандумро кишт намуданд. Ин навъҳо дар зимистони соли 2009 – 2010  ба хунукии 25 – 30 дараҷа ва қабати   1 метру 20 см   барф тоб оварда, баъди обшавии барф хуб нашъунамо намуда, аз ҳар гектари он то 3,5 тонна ҳосили  гандум ба даст оварда шуд.                 Олимон  барои ҳамаи ноҳияҳои Бадахшон кишти  ин навъҳои гандумро   тавсия додаанд.