САФАРИ ҚАРИБУЛВУҚӮИ Э. РАҲМОН БА ПОКИСТОН

Душанбе, 24 ноябр. (АМИТ «Ховар», Мавҷуда Анварӣ).- 23 ноябри соли 2010 сафири фавқулодда ва мухтори Ҷумҳурии Тоҷикистон дар Покистон Зубайдулло Зубайдов бо муовини аввали Вазири корҳои хориҷии ин кишвар Салмон Башир мулоқот доир намуд. Дар вохӯрӣ масъалаҳои марбут ба муносибатҳои дуҷониба ва сеҷонибаи Тоҷикистон, Покистон ва Афғонистон дар марҳилаи кунунӣ мавриди баррасӣ қарор гирифтанд. Муҳокимаи масъалаҳои вобаста ба сафари расмии қарибулвуқӯи Президенти Ҷумҳурии Тоҷикистон Эмомалӣ Раҳмон ба Покистон ва омодагӣ ба он яке аз мавзӯъҳои асосии мулоқот буд. Ҷонибҳо роҷеъ ба ҷаласаи навбатии сарони ҳукуматҳои давлатҳои аъзои Созмони ҳамкориҳои Шанхай дар Душанбе табодули назар намуда, сафари ҳайъати баландпояи Покистонро таҳти роҳбарии Сарвазир Сайид Юсуф Ризо Гелонӣ ба Тоҷикистон исботи кӯшишҳо барои боз ҳам таҳкиму тавсеа бахшидани ҳамкориҳои ду давлати дӯст арзёбӣ намуданд. Зимни сӯҳбат Салмон Башир иброз дошт, ки Покистон барои амалӣ шудани лоиҳаи КАСА-1000, ки барои ин кишвар аҳамияти хосаи ҳаётӣ дорад, кӯшишҳои муассирро ба харҷ хоҳад дод. Сафир қаноатмандии ҷониби Тоҷикистонро аз бозгашти муҳассилини ғайрирасмии кишвараш аз Покистон қайд намуда, иброз дошт, ки ҳамкорӣ дар ин самт минбаъд низ идома хоҳад ёфт. Вобаста ба ин табодули сафарҳои донишҷӯён, аҳли илму адаб ва вакилони парлумони ҳарду кишвар хеле самаранок хоҳад буд.