БАЛАНДБАРДОРИИ САТҲ ВА СИФАТИ ХИЗМАТРАСОНӢ ДАР ФУРУДГОҲ

   Душанбе, 25 январ. (АМИТ «Ховар», Мавзуна Бойева). — Роҳбарияти фурудгоҳи байналмилалии Душанбе ба мустаҳкам намудани заминаи моддӣ — техникӣ ва ба ин васила баланд бардоштани сатҳу сифати хизматрасониҳои рӯизаминӣ эътибори доимӣ медиҳанд. Бо ин мақсад аз Ҷумҳурии Халқии Чин як қатор таҷҳизоти авиатсионӣ ва техникаи хизматрасон (автобусҳо, зинаҳо, автокараҳо, транспортёрҳо, механизмҳои боркаш ва ғайра) харид шудаанд, иттилоъ дод дар нишасти матбуотӣ ба рӯзноманигорони ватанӣ ва хориҷӣ муовини директори генералии ҶСК «Фурудгоҳи байналмилалии Душанбе» Азиз Иброҳимов.    Вусъат додани доираи хизматрасониҳои фурудгоҳ, баланд бардоштани сатҳ ва сифати хизматрасониҳои рӯизаминӣ, такмили маҳорати касбии кормандони фурудгоҳ, таҳкими низоми амният, мустаҳкам намудани интизоми меҳнат дар ҷойи кор, пурзӯр кардани назорат бобати пешгирии вуруди бемориҳои махсусан вазнини сирояткунанда ба қаламрави Ҷумҳурии Тоҷикистон тавассути бунгоҳи назоратӣ — гузаргоҳии (БНГ) фурудгоҳ аз ҷумлаи вазифаҳои дар соли 2011 дар назди роҳбарияти корхона истода мебошанд.