ПЕШГИРИИ ИНТИҚОЛИ ГЕРОИН БА МОСКВА

   Душанбе, 28 январ. (АМИТ «Ховар», Анварбек Сиддиқов).- Чанде қабл кормандони гумруки фурудгоҳи Раёсати минтақавии гумрукӣ дар шаҳри Душанбе ҳангоми барасмиятдарорӣ ва назорати гумрукии мусофирони хатсайри рақами 631 самти Душанбе-Москва шаҳрванди Ҷумҳурии Тоҷикистон Фазлиддин Насров (соли таваллудаш 1985)-ро дар интиқоли ғайриқонунии маводи нашъаовар тавассути сарҳади гумрукии Ҷумҳурии Тоҷикистон гумонбар дониста боздошт намуданд.  Кормандони гумрук ҳангоми муоинаи гумрукии бағоҷи дастии Ф. Нарсов аз дохили ду халтаи носи хушкдошта ду адад бастаи селофанӣ бо хокаи сафеди зардчатоби ба маводи «героин» монандро дарёфт ва мусодира намуданд.  Тавре аз маркази матбуоти Хадамоти гумруки назди Ҳукумати Ҷумҳурии Тоҷикистон ба АМИТ «Ховар» иттилоъ доданд, мутобиқи хулосаи коршиносон маводи нашъаовари дарёфтшуда навъи героин буда, вазни холиси он 1 килограмму 457,2 граммро ташкил дод.     Ёдовар мешавем, ки оид ба ин ҳодиса нисбат ба Фазлиддин Нарсов парвандаи ҷиноӣ оғоз шуда, ба прокуратураи нақлиётии ҷумҳурӣ барои гузаронидани тафтишоти пешакӣ фиристода шуд.