РАФЪИ ИНТИҚОЛИ АШЁИ ҚАДИМӢ

    Душанбе, 28 январ. (Анварбек Сиддиқов).- Чанде қабл кормандони дидбонгоҳи гумрукии фурудгоҳи шаҳри Хуҷанди Раёсати минтақавии гумруки дар вилояти Суғд буда ҳангоми азназаргузаронии бағоҷи мусофирони хатсайри №960 самти Хуҷанд-Москва шаҳрванд С. (соли таваллудаш 1959)-ро ҳангоми интиқоли ғайриқонунии ашёи аҳамияти таърихию фарҳангӣ дошта боздошт намуданд.   Тавре аз маркази матбуоти Хадамоти гумруки назди Ҳукумати Ҷумҳурии Тоҷикистон ба АМИТ «Ховар» иттилоъ доданд, аз дохили сумкаи рангаи хокистарранги номбурда 4 адад лавозимоти қадима, аз ҷумла як адад кўзаи мисин ва се адад кўзаҳои лойини қадимаро дарёфт ва мусодира намуданд.    Тибқи хулосаи ташхиси Раёсати фарҳанги вилояти Суғд ашёи мусодира гардида лавозимоти қадимӣ буда, обдони мисин ба солҳои 50-уми асри 20, нафтандоз ё худ симобкўзачаҳо ба асрҳои 13-14–ум тааллуқ дошта, интиқоли онҳо бе иҷозатномаи Вазорати фарҳанг аз марзи Ҷумҳурии Тоҷикистон манъ мебошад.  Аз рўи ин ҳодиса парвандаи ҳуқуқвайронкунии маъмурӣ оғоз гардида, тафтиш идома дорад.