ҚАРЗҲОИ ИМТИЁЗНОК БА ШАҲРВАНДОНИ БЕКОР

    Суғд, 15 феврал. (АМИТ «Ховар», Мирзоалӣ Амонов, Самад Юсуфӣ). — Шӯъбаи Агентии давлатии ҳифзи иҷтимоӣ, шуғли аҳолӣ ва муҳоҷирати ноҳияи Мастчоҳ дар соли 2010 баҳри иҷрои барномаи давлатии сиёсати шуғл корҳои зиёдро ба сомон расонид. Аз 2202 нафар муроҷиаткардагон, ки аксарият корҷӯён буданд, 641 нафар бо ҷои кор таъмин шуданд. Бо мадади Кумитаи ҳамоҳангсози мусоидат бо шуғли аҳолӣ 1832 ҷойи нави корӣ таъсис дода шуд.    Барои ташкили соҳибкории инфиродӣ ба 45 нафар шаҳрвандони бекор қарзҳои имтиёзнок дода шуд, ки ин маблағро 19 нафар барои ташкили чорводорӣ, 10 нафар барои кишту парвариши ғалладонагиҳо, 10 нафар барои истеҳсоли сабзавоту зироати полезӣ, 2 нафар барои ташкили соҳаи занбӯрпарварӣ масраф намуданд.    Аз ҳисоби занону духтарон 261 нафар бо ҷои корӣ таъмин гардида, 164 нафар ба курсҳои касбомӯзӣ ҷалб шуданд, ба 15 нафар занону духтарон барои ташкили соҳибкории инфиродӣ қарзи имтиёзнок дода шуд.