БЕҲТАРГАРДИИ ТАЪМИНОТИ МАРДУМ БО БАРҚ

Душанбе, 1 феврал. (АМИТ «Ховар», Эътибор Юсуфӣ). — Дар  соли  2010  истеҳсоли   нерӯи   барқ дар ҷумҳурӣ 14 миллиарду 614  миллион  кВт/ соатро  ташкил  дод,  ки  ин  нисбат ба ҳамин давраи соли гузашта   417 миллион кВт/ соат зиёд  мебошад. Аз ин миқдор 10 миллиарду    553 миллион кВт/ соат  нерӯи барқ дар НБО-и Норак истеҳсол шудааст,- хабар доданд аз маркази  матбуоти ШСХК «Барқи Тоҷик».   Дар натиҷаи дуруст ба роҳ мондани реҷаи коркарди обанбори  Норак сатҳи оби обанбор то 19 октябри соли 2010 дар нишондоди  910,50  метр нигоҳ дошта шуд. Ин имконият дод, ки таъминоти аҳолии  ноҳияҳои ҷумҳурӣ бо нерӯи барқ дар моҳи ноябр то 10 соат ва  дар моҳи декабр то 12 соат расонида шуда, аҳолии шаҳрҳои Душанбе, Қурғонтеппа, Кӯлоб,  Роғун,  Хуҷанд, Қайроққум ва  Чкалов бо нерӯи барқ бемаҳдудият таъмин  гарданд. Дар  давраи  амалишавии меъёри нерӯи барқ агар дар соли гузашта истифодабарии барқ  дар ҷумҳурӣ  42,7 миллион кВт/соатро дар як шабонарӯз ташкил медод, ин нишондиҳанда дар соли ҷорӣ ба 48 — 50 миллион кВт/соат баробар шуд.