БУНЁДИ 200 ИНШООТ БА ИФТИХОРИ ҶАШНИ БУЗУРГИ МИЛЛӢ

Душанбе, 1 феврал. (АМИТ «Ховар», Бекназари Абӯбакр). — Дар қаламрави вилояти Суғд бахшида ба ҷашни 20-солагии Истиқлолияти давлатии Ҷумҳурии Тоҷикистон корҳои ободонию бунёдкорӣ авҷ гирифта,  сохтмони 200 иншооти ҷашнӣ идома дорад. Аз ҷумла, сохтмони ҳавзи шиноварӣ, бинои таълимии Донишгоҳи ҳуқуқ, бизнес ва сиёсати Тоҷикистон, Кохи матбаа, хиёбони Исмоили Сомонӣ дар шаҳри Хуҷанд, маҷмааи таълимӣ ва истироҳатии кӯдакон дар ноҳияи Ҷаббор Расулов, чойхонаи миллӣ дар ноҳияи Бобоҷон Ғафуров, корхонаи ҷӯроббарорӣ дар ноҳияи Зафаробод ва фабрикаи ресандагӣ дар ноҳияи Мастчоҳ босуръат ҷараён доранд. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки ҷиҳати густариши корҳои омодагӣ ба таҷлили ин ҷашни бузурги миллӣ қарорҳои раиси вилояти Суғд «Дар бораи тадбирҳои иловагии омодагӣ ба таҷлили 20 – солагии Истиқлолияти давлатии Ҷумҳурии Тоҷикистон», «Дар бораи озмуни вилоятии шаҳри (ноҳияи) беҳтарин», «Дар бораи озмуни вилоятии мутахассиси беҳтарин» ба имзо расидаанд. Иншооти мазкур дар арафаи таҷлили ҷашни 20-солагии Истиқлолияти давлатии Ҷумҳурии Тоҷикистон ба истифода дода мешаванд.