ИНҚИЛОБИ ЭРОН 32- СОЛА ШУД

 Душанбе,  9 феврал. (АМИТ «Ховар», Марзия Саидова). — «Бо пирӯзии инқилоби исломӣ, ки соли 1979 дар Эрон ба вуқӯъ омад, режими 2500-солаи шоҳаншоҳӣ пош хӯрда, охирин сулолаи паҳлавӣ, ки тӯли 54 сол  сари қудрат буд,  сарнагун гардид», гуфт дар ҷамъи хабарнигорон дар Душанбе  сафири фавқулодда ва мухтори Ҷумҳурии Исломии Эрон дар Ҷумҳурии Тоҷикистон Алиасғари Шеърдӯст. Сафир афзуд, ки бо пирӯзии инқилоби исломӣ 11 феврали соли 1979 бо роҳбарии Оятуллоҳ Хумайнӣ, ки охирин шоҳи Эрон -Ризошоҳи Паҳлавӣ сарнагун гардид, низоми нави давлатдорӣ рӯи кор омад, ки дар ташаккули пояҳои давлатдорӣ, пешрафту шукуфоӣ дар ин кишвар нақши муассир гузошт. А. Шеърдӯст доир ба сабабҳои сар задани инқилоб, авзои сиёсии солҳои инқилоб ва дастовардҳои Эрон баъд аз пирӯзии инқилоби исломӣ ибрози назар карда гуфт, ки дар муддати 32 соли баъд аз инқилоб кишвараш ба дастовардҳои муҳими иқтисодию сиёсӣ, иҷтимоию фарҳангӣ ноил гардида, дар миқёси минтақа ва ҷаҳон ба ҳайси яке аз кишварҳои бузургу пешрафта  пазируфта шудааст.        Дипломати эронӣ, инчунин, доир ба вазъи кунунии муносибатҳои  гуногунсоҳаи Тоҷикистону Эрон табодули назар карда, ба сатҳи ҳамкориҳои ҳасанаи ҳар ду кишвари дӯсту ҳамзабон баҳои баланд дод. Мавсуф афзуд,  ки робитаҳои мутақобилан судманд ва дӯстонаи Тоҷикистону Эрон дар партави сиёсатҳои пешгирифтаи  сарони кишварҳо беш аз пеш тавсеа меёбанд.