ИВАЗИ ҲИСОБКУНАКҲОИ ИНДУКСИОНӢ БА ЭЛЕКТРОНӢ

Душанбе, 2 феврал. (АМИТ «Ховар», Мавзуна Бойева). — Ҳаҷми воқеии хароҷоти технологии нерӯи барқ    соли гузашта 14,1 фоиз ё  2321,1 миллион кВт/соатро ташкил дод, ки ин нисбат ба  меёърҳои муқарраргардида 0,6 фоиз зиёд мебошад,   иттилоъ доданд ба мухбири АМИТ «Ховар»  аз  ШСКХ «Барқи Тоҷик».                          Бо мақсади самаранок истифода намудани нерӯи барқ дар давраи ҳисоботӣ, ҷиҳати паст намудани сатҳи хароҷоти нерӯи барқ дар  низоми энергетикӣ чораҳои мушаххас андешида шуданд, аз ҷумла, барои пурзӯр намудани назорат ва саҳеҳ намудани нишондиҳандаҳои истифодаи нерӯи барқ дар нуқтаҳои интиқоли байнидавлатӣ, нуқтаҳои сарҳисоби  барқи байниминтақавӣ ва байниноҳиявӣ ҳисобкунакҳои электронӣ насб  шуданд. Ҳамчунин, дар тамоми зеристгоҳҳои барқӣ ва нуқтаҳои трансформаторӣ  низоми ба ҳисобгирии истифодаи нерӯи барқ барои ба низом даровардани кор  ҷараён дорад.             Бо мақсади боз ҳам паст намудани сатҳи талафот ва зиёд намудани сатҳи ҷамъоварии маблағҳои фурӯши барқ аз ҷониби ШСКХ «Барқи Тоҷик» айни замон дар доираи татбиқи лоиҳаи «Кам кардани талафоти нерӯ» бо дастгирии Бонки умумиҷаҳонии Рушд ва гранти давлати Швейтсария дар шаҳри Душанбе ҳисобкунакҳои индуксионӣ ба ҳисобкунакҳои электронӣ иваз   шуда истодаанд. Ҳамин тавр, то ҳолати якуми январи соли 2011 шумораи умумии ҳисобкунакҳои насбшуда ба 165 097 адад расонида шуд.